धनगढीः धनगढीबाट काडमाडौंको लागि गुडेको बसले ट्रकलाई ओभरटेक गर्दा दुर्घटनामा परेको यात्रुहरुले बताएका छन्।
१ जनाको मृत्यु र २७ जना घाइते हुने गरि दुर्घटनामा परेको बसले कैलालीको घोडाघोडी नगरपालिका ५ डोके बजारस्थित पूर्व पश्चिम राजमार्गमा अगाडि गुडिरहेको ट्रकलाई ओभरटेक गर्ने क्रममा दुर्घटनामा परेको यात्रुहरुले बताएका छन्।
दुर्घटनाबाट जोगिएका यात्रु जगदिश फुलाराले भने, “काठमाडौंको लागि यो बस धनगढीबाट पौने ४ बजे हिडेको हो। अत्तरियाबाट साढे ५ बजेतिर हिँडेको हो। अगाडि ट्रक गुडिरहेको थियो। ट्रकले साइड नै दिइरहेको थिएन। हाम्रो साइड पनि ट्रकले च्यापेको थियो। त्यहीबेला साइकल चालकलाई बचाउँने क्रममा दुर्घटनामा परेको हो। म ड्राइभरसँगै अगाडिको सिटमा थिए। बसमा करिब ३२ जना सवार थिर्यौ।”
जिल्ला प्रहरी कार्यालय कैलालीका प्रहरी निरीक्षक हिक्मत थापाका अनुसार धनगढीबाट काठमाडौंको लागि हिडेको ना ६ ख ७४६१ नम्बरको खप्तड मालिका यातायातको बस दुर्घटनामा परेको हो।
घटनास्थलमै मृत्यु भएका एक यात्रुको पहिचान अझै खुल्न नसकेको प्रहरीले जनाएको छ। बसले च्यापिएको अवस्थामा शव रहेको बताउँदै प्रहरी निरीक्षक थापाले लम्कीबाट बोलाइएको क्रेनले बसलाई उठाउन नसकेपछि अर्को क्रेन धनगढीबाट बोलाइएको बताए।
त्यस्तै, घाइते मध्ये १ जनालाई कोहलपुर रेफर गरिएको छ। भने बाँकी घाइतेहरुको सुखडस्थित घोडाघोडी अस्पतालमा उपचार भइरहेको प्रहरी निरीक्षक थापाले जानकारी दिए। दुर्घटनाबारे विस्तृत विवरण आउन बाँकी रहेको छ। घटना स्थलमा इलाका प्रहरी कार्यालय सुखडको टोली परिचालन गरिएको छ। घाइतेहरुको उद्वारको कार्य जारी रहेको प्रहरीले जनाएको छ।
प्रतिक्रिया