पञ्चदेवल विनायक, अछाम –
सुदूरपश्चिम प्रदेश सरकारले पारित गरेको स्थानीय सेवा ९गठन तथा सञ्चालन ऐन, २०८१ अन्तर्गत कर्मचारी समायोजनसम्बन्धी व्यवस्थामा देखिएको अन्याय विरुद्ध पञ्चदेवल विनायक नगरपालिका सहित प्रदेशभरका स्वास्थ्यकर्मीहरु चरणबद्ध आन्दोलनमा उत्रिएका छन्।
हाल संघीय स्वास्थ्य सेवाबाट समायोजन भई स्थानीय तहमा चौथो र पाँचौँ तहबाट क्रमशः पाँचौँ र छैठौँ तहमा पुगेका स्वास्थ्यकर्मीहरू सेवाकाल पाँच वर्ष पूरा भइसकेका वा हुन बाँकी अवस्थामा छन्।
ऐनको दफा ९ को उपदफा ४ अनुसार, समायोजन पश्चात पाँच वर्ष सेवा अवधि पूरा गरेका कर्मचारीलाई मात्र एकपटकका लागि एक तह बढुवा (स्तरवृद्धि) दिने व्यवस्था गरिएको छ। यदि सेवा अवधि पुगेकै आधारमा तह वृद्धि दिइने हो भने, उक्त व्यवस्था संघीय कानुनसँग बाझिन सक्ने सम्भावना रहन्छ। संघीय कानुनसँग मेल नखाने अवस्था आएमा त्यस प्रकारको व्यवस्था स्वतः खारेज हुने कानुनी प्रावधान पनि छ।
तर, प्रदेश सरकारले उक्त व्यवस्था प्रष्ट रूपमा नबुझी, माथिल्लो तहमा कार्यरत र उच्च शैक्षिक योग्यता भएका कर्मचारीभन्दा तल्लो शैक्षिक योग्यता भएका कर्मचारीहरूलाई जेष्ठता दिन थालेको पाइन्छ। यसले लोकसेवा आयोगमार्फत सिफारिस भई आएका पुराना तथा योग्य कर्मचारीहरूको मनोबलमा गम्भीर असर पारेको छ। आफूहरू अन्यायमा परेको महसुस गर्दै सम्बन्धित कर्मचारीहरूले यस निर्णयको विरोध जनाएका छन्।
स्वास्थ्यकर्मीहरूद्वारा प्रमुख प्रशासकीय अधिकृतमार्फत नगरपालिकालाई बुझाइएको ग्यापन पत्रमा, न्यायोचित माग सम्बोधन नभएसम्म सेवा प्रवाह गर्न नसकिनेू स्पष्ट उल्लेख गरिएको छ। साथै, आन्दोलनका कार्यक्रमहरू मुख्यमन्त्री तथा मन्त्री परिषदको कार्यालय धनगढी केन्द्रित हुने जनाइएको छ।
स्वास्थ्य सेवा प्रभावित हुन सक्ने भएकाले आम नागरिकलाई यसबाट पर्न जाने असुविधाप्रति क्षमा माग्दै, आन्दोलनको सम्पूर्ण जिम्मेवारी प्रदेश सरकार र सम्बद्ध निकायले लिनुपर्ने चेतावनी पनि उनीहरूले दिएका छन्।
यस आन्दोलनमा सुदूरपश्चिम प्रदेशका ८८ वटा पालिकाका स्वास्थ्यकर्मीहरू स्वतन्त्र रूपमा सहभागी भएका छन्।
प्रतिक्रिया