अछाम , – पञ्चदेवल विनायक नगरपालिका–२ मा ज्येष्ठ नागरिकहरूको स्वास्थ्य सुरक्षालाई मध्यनजर गर्दै विशेष निःशुल्क स्वास्थ्य परीक्षण कार्यक्रम सुरु गरिएको छ। हिजो देखि सुरु भएको यो कार्यक्रम आगामी ६ दिनसम्म सञ्चालन हुनेछ।
कार्यक्रम अन्तर्गत स्वास्थ्यकर्मीहरूको टोलीले घरदैलो सेवा मार्फत ज्येष्ठ नागरिकहरूको स्वास्थ्य परीक्षण, औषधि वितरण तथा आवश्यक परामर्श प्रदान गरिरहेका छन्।
स्वास्थ्य परीक्षण मुख्यतः वृद्ध अवस्थासँग सम्बन्धित दीर्घकालीन नसर्ने रोगहरू जस्तै उच्च रक्तचाप, मधुमेह, दम, दीर्घश्वास (सीओपीडी) आदिको पहिचान र उपचारमा केन्द्रित छ। स्वास्थ्यकर्मीहरूको भनाइ अनुसार यस्ता रोगहरूको समयमै परीक्षण तथा नियन्त्रणले वृद्धहरूकाे जीवनस्तरमा सुधार ल्याउने अपेक्षा गरिएको छ।
साथै, सरुवा रोगहरू—जस्तै टाइफाइड, मलेरिया, कालाजार आदिको परीक्षण गरिनुका साथै क्षयरोगको पहिचानका लागि नमुना संकलनको व्यवस्था गरिएको छ। यसले रोगको समयमै पहिचान र नियन्त्रण गर्न सहयोग पुर्याउने जनाइएको छ।
कार्यक्रमका एक स्वास्थ्यकर्मीका अनुसार, “वृद्धहरू प्रायः स्वास्थ्य संस्थासम्म जान सक्दैनन्, त्यसैले सेवा घरमै पुर्याउने उद्देश्यले यो कार्यक्रम ल्याइएको हो। यसले उनीहरूको स्वास्थ्य सजगता र सेवामा पहुँच बढाउनेछ।”
कार्यक्रमको सञ्चालनमा पञ्चदेवल विनायक नगरपालिका–२ कार्यालयको सक्रिय सहभागिता रहेको छ। वडाले आर्थिक स्रोत उपलब्ध गराउनुका साथै उपकरण र आवश्यक प्रविधिको व्यवस्थापनमा सहयोग गरेकोमा आयोजकले धन्यवाद व्यक्त गरेका छन्।
स्थानीयस्तरमा स्वास्थ्य सेवा पुर्याउने उद्देश्यले सञ्चालन गरिएको यो कार्यक्रमले न केवल स्वास्थ्य परीक्षणको अवसर दिएको छ, तर जनचेतना अभिवृद्धिमा समेत योगदान पुर्याएको स्थानीय बासिन्दाहरूको भनाइ छ।
प्रतिक्रिया