काठमाडौं । सत्तारूढ दल नेपाली कांग्रेसले वैशाख १० गते हुने उपनिर्वाचनका लागि आज उमेदवार टुंगो लगाउने तयारी गरेको छ । पार्टीको केन्द्रीय कार्यसम्पादन समितिको आज बस्ने बैठकले उपनिर्वाचनका लागि उमेदवार टुंगो लगाउने बताइएको छ ।
बैठकले पार्टीबाट सरकारमा कसकसलाई पठाउने भन्ने निर्णय पनि गर्नेछ । यसका लागि बिहान ११ बजे पार्टी केन्द्रीय कार्यालय सानेपामा बैठक बस्दै छ । पार्टी उपसभापति पूर्णबहादुर खड्काको नेतृत्वमा सरकारमा जाने कांग्रेसको तयारी छ । मन्त्रालयको भागबण्डामा कांग्रेसको भागमा आठवटा मन्त्रालयल परेको छ ।
कांग्रेसका एक पदाधिकारीका अनुसार आजको बैठकले उमेदवार टुंगो लगाउने दाबी गरे । वैशाख १० गते चितवन–२, बारा–२ र तनहुँ–१ मा उपनिर्वाचन हुँदै छ ।
ती पदाधिकारीका अनुसार चितवन–२ मा पार्टीले पूर्वजिल्ला सभापति जितनारायण श्रेष्ठलाई उमेदवार बनाउने तयारी गरेको छ । मंसिर ४ मा भएको निर्वाचनमा त्यहाँबाट उमेश श्रेष्ठलाई उमेदवार बनाएको थियो ।
पार्टीले तनहुँ क्षेत्र १ मा गोविन्द भट्टराईलाई उमेदवार बनाउने तयारी गरेको छ । मंसिर ४ को निर्वाचनमा यहाँबाट रामचन्द्र पौडेलले चुनाव जितेका थिए । पौडेल राष्ट्रपति भएपछि त्यहाँ उपनिर्वाचन हुन लागेको हो ।
पार्टीले बारा–२ मा भने उपनिर्वाचनमा उमेदवार नउठाउने भएको छ । यहाँ पार्टीले जसपाबाट उमेदवार बन्ने तयारीमा रहेका उपेन्द्र यादवलाई सहयोग गर्ने तयारी गरेको छ ।
उपेन्द्रलाई सघाउने गरी बारा–२ मा पार्टी सभापति शेरबहादुर देउवाले उमेदवार नउठाउने पदाधिकारीमाझ जानकारी गराइसकेका छन् ।
प्रतिक्रिया