धनगढीको हुलाकी सडकमा पनि स्मार्ट सडक बत्ती जडान हुने

धनगढीः हुलाकी राजमार्गको कैलाली खण्डमा ६९ किलोमिटर सडक स्तरवृद्धि हुँदैछ। धनगढी उपमहानगरपालिका क्षेत्रको ३ किलोमिटरसहित लम्की र टीकापुर क्षेत्रमा ४ लेन सडक विस्तारको काम जारी छ।

हुलाकी राजमार्ग आयोजना कार्यालयले धनगढीमा तीन किलोमिटरसहित लम्की र टीकापुर क्षेत्रमा स्मार्ट सडक बत्ती जडानका लागि प्रक्रिया सुरु गरेको छ। धनगढी उपमहानगरपालिकाले स्मार्ट सडक बत्ती जडानका लागि आग्रह गरेको हुलाकी सडक योजना कार्यालयले बताएको छ।

हुलाकी राजमार्ग आयोजना कार्यालय धनगढीका प्रमुख सविन जोशीका अनुसार उपमहानगरपालिकाको आग्रहमा विस्तृत आयोजना प्रतिवेदन (डिपीआर) तयार हुँदैछ। उनले भने, ‘स्मार्ट बत्तीका लागि मेयर साबले पेस गर्नु भएको थियो। हामीले पनि लागत स्टिमेट तयार गरेर बजेटको लागि माग गर्नुपर्ने हुन्छ। प्रक्रिया अगाडि बढाउदैछौँ।’

धनगढी उपमहानगरपालिकाको क्याम्पस चोकदेखि मनहेरास्थित कालिका मन्दिर सम्मको ३ किलोमिटर सडकलाई ४ लेनसहित अन्य खण्डलाई दुई लेनमा विस्तार गरिदैँछ। चार लेन सडक क्षेत्रमा स्मार्ट सडक बत्ती जडानको प्रक्रिया सुरु भएको हो।

नेपाल विद्युत प्राधिकरणको सहयोगमा हुलाकी सडक योजना कार्यालय, धनगढीले डिपीआर तयार पारेर बत्ती जडान गर्ने बताएको छ। हुलाकी सडक योजना कार्यालय धनगढीका प्रमुख जोशीले भने, ‘स्मार्ट लाइटमा दररेटका लागि हामीलाई जानकारी हुँदैन। हामी विद्युतका विज्ञ होइनौँ। विद्युत प्राधिकरणबाट सहयोग मागेर गरौला भनेका छौँ।’ उनका अनुसार धनगढीको चार लेन र टीकापुर तथा लम्की क्षेत्रमासमेत स्मार्ट सडक बत्ती जडान गर्न प्रक्रिया थालिएको हो।

सहरी क्षेत्र तथा चार लेन सडक निर्माण भएको क्षेत्रमा बत्ती जडानका लागि डिपिआर तयार हुने भएको हो। हुलाकी सडक योजना कार्यालयले डिपिआर तयार गरेपछि संघीय सरकारसँग बजेट माग गर्नेछ। संघीय सरकारले बजेट दिएपछि हुलाकी सडकले नै स्मार्ट सडक बत्ती जडानका लागि ठेक्का सम्झौता गर्ने भएको हो।

धनगढी उपमहानगरपालिकाका नगर प्रमुख गोपाल हमालले ६ महिना अगाडिबाट प्रक्रिया थालेको बताए। हुलाकी सडकको धनगढी कार्यालय र हुलाकी राजमार्ग निर्देशनालयमा पत्र पठाएको उनले बताए। उनले भने, ‘उहाँँहरुले टेण्डर गर्दा बत्ती थिएन्। सडक चार लेनको बन्दैछ। हाइ स्पिड सडक हुन्छ। दुर्घटनाका कारण धन जनको क्षति हुने भएकाले स्मार्ट लाइट आवश्यक छ। सुरक्षा र सौन्दर्यका लागि पनि बत्ती आवश्यक छ।’ नगर प्रमुख हमालका अनुसार सडक बत्ती र साइकल लेनका लागि निवेदन पेश गरिएको हो।

धनगढीदेखि बसन्तासम्मको २८ किलोमिटर र बसन्तादेखि सत्तीसम्मको बाँकी १३ किलोमिटर, लम्की–टीकापुर–सत्ती २८ किलोमिटर सडक खण्ड २ लेनमा स्तरवृद्धि हुँदैछ। लम्की–टीकापुर सडकखण्डको २ किलोमिटर क्षेत्रमा भने सहरी विकासले सडक निर्माण गर्दैछ।